Økið á Nesi er áhugavert fornfrøðisliga. Tí ynskir Tjóðsavnið, at fjørðubakkin verður vardur á ein virðiligan og varandi hátt móti ávirkanini frá havalduni.

Verkætlanin vísir á eitt møguligt verjuprinsipp, har atlit verður tikið bæði til landslagið og haldføri í loysnini. Hugsað verður um eina konstruktiva styrking av bakkanum, har armeringsstengur verða forankraðar í helluna, og ein grótgarður verður gjørdur frá fjøru og upp í hagaøkið. Um hæddarmunurin gerst ov stórur, verður grótlaðingin í tveimum.

Við hesum verður roynt at gera eina brimverju, ið tillagar seg til lendið samstundis sum fornfrøðiligu leivdirnar verða vardar í framtíðini.